Оросын VTB банк нь дотоодын финтек компани болон Виза-тай хамтран ресторанд үйлчлүүлэхдээ камер луу харах төдийд л төлбөрөө төлөх боломжтой үйлчилгээг нэвтрүүлэхээр ажиллаж байна.

VTB банк нь өөрийн хурдасгуур хөтөлбөрийн гишүүдийн нэг болох O.Vision-тэй хамтран Санкт-Петербург дахь KiO Kitech сүлжээ дэлгүүрүүдэд уг системийг туршиж байгаа аж.

Нүүр царайгаараа төлбөр тооцоо хийхийн тулд үйлчлүүлэгчид эхлээд O.Vision гар утасны аппликейшнийг суулгаж, утасны дугаараа бүртгүүлэн, нүүрний биометрээ хадгалж, төлбөрийн картаа холбох хэрэгтэй юм. Үүний дараагаар тэд рестораны төлбөрийн терминалын камер руу харах хэрэгтэй аж.

VTB банкнаас O.Vision нэрт уг царай таних алгоритмыг сая гаруй хүний биометрийн бүртгэлийн мэдээллийн санд үндэслэн туршсан бөгөөд үйлчлүүлэгчийн нүүр царайг тодорхойлж, төлбөр тооцоог секундын дотор хийдэг тухай мэдээлэлжээ.

Мөн энэхүү үйлчилгээг зах зээлд ашиглаж эхэлсний дараагийн дөрвөн сарын хугацаанд уг системээр дамжуулан төлбөрөө төлсөн үйлчлүүлэгчид 20% -ийн хөнгөлөлт эдлэх юм байна.

VTB банкыг төлөөлж Юлия Копытова хэлэхдээ: “Энэ төрлийн шинэ шийдлүүд нь худалдаа, үйлчилгээний газруудад хэрэглэгчдийн үйлчилгээг сайжруулах төдийгүй ирээдүйн экосистемийг хөгжүүлэх боломжийг олгодог.” гэжээ.

Монголын Финтекийн Холбоо